डॉ. श्रीपाद जोशी (इंदोर) यांना मसापचा सोनोपंत दांडेकर स्मृती पुरस्कार जाहीर

पुणे : महाराष्ट्र साहित्य परिषद पुणे तर्फे दरवर्षी डॉ. म. वि. गोखले पुरस्कृत कै. प्राचार्य शं. वा. तथा सोनोपंत दांडेकर स्मृती पुरस्कार, तत्वज्ञान / नीती / अध्यात्म / मानसशास्त्र विषयक ग्रंथाला दिला जातो. या वर्षीचा हा पुरस्कार 'मानवी स्वभावाचे त्रिगुणात्मक विश्लेषण' या ग्रंथासाठी डॉ. श्रीपाद जोशी (इंदोर) याना दिला जाणार आहे. रुपये ७५००/- आणि सन्मानपत्र असे या पुरस्काराचे स्वरूप आहे. या पुरस्कारासाठी ग्रंथांची निवड डॉ. अविनाश अवलगावकर व डॉ. चंद्रशेखर चिंगरे यांच्या निवड समितीने केली.

संतसाहित्याचे ख्यातनाम अभ्यासक मा. डॉ. अभय टिळक यांच्या हस्ते आणि मसापचे कार्याध्यक्ष प्रा. मिलिंद जोशी यांच्या अध्यक्षतेखाली हा पुरस्कार प्रदान समारंभ सोमवार दि. २२ जुलै २०१९ रोजी सायंकाळी ६. ३० वाजता महाराष्ट्र साहित्य परिषदेच्या माधवराव पटवर्धन सभागृहात होणार आहे. अशी माहिती 'मसाप' चे कार्यवाह बंडा जोशी यांनी दिली.